Cefndir a phwrpas y Pwyllgor Archwilio a Risg

Nod y Pwyllgor Archwilio a Risg yw cynorthwyo Bwrdd Ymddiriedolwyr yr Urdd gyda’i gyfrifoldeb drwy graffu ar a herio’r prosesau strategol ar gyfer risg, rheolaeth a llywodraethiant. Bydd y Pwyllgor Archwilio a Risg yn cyfarfod gyda’r Bwrdd Ymddiriedolwyr yn flynyddol i drafod eu hadroddiad blynyddol. Bydd gan y pwyllgor hwn Gadeirydd annibynnol a’r aelodaeth yn cynnwys 3 o ymddiriedolwr yr Urdd.

Jayne Woods

Cadeirydd, Pwyllgor Archwilio a Risg

Mae Jayne yn gyfrifydd siartredig ac yn arbenigo mewn darparu cyngor cyllidol, risg a llywodraethiant yn y sector cyhoeddus. Mae’n gyfarwyddwr anweithredol mewn sawl sefydliad yn y sector addysg ac mae’n aelod o bwyllgor cyfalaf Cyngor Celfyddydau Cymru. Mae ganddi brofiad sylweddol o wasanaethu ar bwyllgorau archwilio a risg ac ar hyn o bryd mae'n gwasanaethu ar bwyllgorau Comisiynydd y Gymraeg ac Ombwdsmon Gwasanaethau Cyhoeddus Cymru. Mae wedi gweithio yn y sectorau cyhoeddus a phreifat ar amrywiaeth eang o faterion ariannol. Yn gynt, bu’n Brif Swyddog Cyllid i Gomisiynydd yr Heddlu ac yn ymgynghorydd ac yn archwilydd yn Deloitte.

Rôl y Pwyllgor Archwilio a Risg

Dyma drosolwg o brif gyfrifoldebau’r Pwyllgor:

• Gorchwylio’r broses wrth benodi neu ailbenodi Archwilwyr Allanol.
• Monitro yn flynyddol perfformiad yr archwilwyr Allanol.
• Trafod gyda’r archwilwyr materion sydd wedi codi yn ystod yr archwiliad, gan gynnwys y llythyr rheoli gan yr Archwilwyr Allanol a chynnwys ymatebion y rheolwyr; a barn ffurfiol yr Archwilwyr Allanol.
• Craffu ar y materion canlynol, a chytuno ar argymhelliad / argymhellion i’r Bwrdd fel bo’n briodol:

- Adroddiad yr Ymddiriedolwyr a Datganiadau Ariannol blynyddol.
- Y llythyr cynrychiolaeth cyn ei argymell i’r Bwrdd Ymddiriedolwyr ei ystyried a chymeradwyo.

• Adolygiad rheolaidd o Bolisi Risg a chofrestr Risg yr Urdd.
• Unrhyw ddiwygiadau i bolisïau’r sefydliad ar ddatgan buddiannau, gwrth dwyll, prosesau ‘chwythu chwiban’ a threfniadau ar gyfer ymchwiliadau arbennig.
• Adolygiad rheolaidd buddiannau’r Bwrdd Ymddiriedolwyr a’r Tîm Rheoli.
• Diwygiadau i gylch gorchwyl y Pwyllgor (fel arfer yn dilyn gwerthusiad blynyddol o’i berfformiad ei hun).
• Gorchwylio’r broses i ddatblygu a rheoli strategaeth a pholisi buddsoddi o fewn fframwaith strategaeth a risg wedi eu diffinio gan y Bwrdd.
• Asesu ac adolygu'r strategaeth a pholisi buddsoddi a risg.
• Asesu a chymeradwyo i’r Bwrdd unrhyw newidiadau i’r buddsoddiadau.