Urdd Gobaith Cymru / Beth yw #FelMerch

- Beth yw #FelMerch -

Mae #FelMerch yn brosiect newydd gan Adran Chwaraeon yr Urdd, wedi'i chefnogi gan Chwaraeon Cymru, sydd wedi’i sefydlu yn arbennig er mwyn ysbrydoli, cefnogi ac ymbweru merched ifanc i gadw’n actif a chwalu’r rhwystrau sy’n atal merched rhag cymryd rhan mewn chwaraeon.

Beth mae'r ymchwil yn dweud...

Yn ôl ymchwil gan Always nid yw mwy na hanner (55%) o ferched yn eu harddegau yn cadw’n heini, gyda thri chwarter ohonynt (75%) yn teimlo bod angen mwy o gefnogaeth i’w cadw mewn chwaraeon.

Mae ymchwil ddiweddar gan Chwaraeon Cymru hefyd yn dangos fod y pandemig wedi arwain at fwy o fenywod yn adrodd eu bod yn gwneud llai o chwaraeon, yn ogystal â theimlo’n euog am beidio â chadw’n heini, ac yn poeni am adael y tŷ.

Sut mae #FelMerch am chwalu'r rhwystrau...

1. Sefydlu gweithgareddau wythnosol cynhwysol

2. Sefydlu fforymau rhanbarthol a chenedlaethol

3. Penodi Llysgenhadon er mwyn ysbrydoli eraill, gan gynnwys Llysgenhadon cenedlaethol fel maswr tîm merched Cymru a Bryste, Elinor Snowsill

4. Darparu rhaglenni arweinyddiaeth.

5. Sefydlu hybiau cymunedol yn ystod gwyliau.

6. Cynhadledd genedlaethol er mwyn rhannu llwyddiant a syniadau.

Mae Dirprwy Weinidog y Celfyddydau a Chwaraeon, a’r Prif Chwip, Dawn Bowden AS yn croesawu’r cyhoeddiad: “Rwy’n cydnabod bod angen gwneud mwy i gau’r bylchau sy’n bodoli rhwng dynion a merched pan mae hi’n dod i gymryd rhan mewn chwaraeon a gweithgaredd corfforol, a chanolbwyntio ar ddarparu mwy o gyfleoedd o ansawdd i ferched a menywod ifanc gymryd rhan mewn chwaraeon. Rwy’n falch iawn o gefnogi prosiect Urdd Gobaith Cymru “#FelMerch”; bydd ganddo ran bwysig i’w chwarae wrth annog cyfranogiad merched mewn gweithgareddau chwaraeon, waeth beth fo’u gallu, ac wrth greu amgylcheddau diogel i wneud hynny.”

Siân Lewis, Prif Weithredwr Urdd Gobaith Cymru: “Mae cadw’n heini a chymryd rhan mewn chwaraeon yn gwella iechyd meddwl yn ogystal â chorfforol, yn codi hyder a hunan-barch, ac yn medru arwain at gyrhaeddiad addysgol hefyd. Felly rydym yn benderfynol o sicrhau fod digon o gyfleoedd gan ferched Cymru i ymwneud â chwaraeon, a hynny o fewn gofod diogel, gan gynnwys darparu sesiynau ymarfer ar-lein sy’n diwallu eu hanghenion.”

Sarah Powell, Prif Weithredwr Chwaraeon Cymru: “Mae ehangu apêl gwneud ymarfer corff a chwaraeon i ferched a menywod, yn ogystal â deall y rhwystrau sy’n atal cyfranogiad, yn parhau i fod yn flaenoriaeth i ni. Byddwn yn cefnogi ymdrechion yr Urdd i adeiladu ar y cynnydd da a oedd yn cael ei wneud cyn pandemig ac i feddwl yn greadigol wrth ddatblygu cyfleoedd o ansawdd uchel i ferched a menywod eu mwynhau.

“Yn naturiol ddigon bydd rhai unigolion yn bryderus wrth ddychwelyd i wneud gweithgareddau ochr yn ochr ag eraill, felly hoffwn roi sicrwydd i unrhyw un sy’n teimlo’n bryderus bod llawer iawn o waith wedi’i wneud i sicrhau fod gweithgareddau yn ddiogel a chroesawgar. Mae mwy na 1,000 o glybiau a sefydliadau chwaraeon ledled Cymru wedi elwa o gyllid ychwanegol yn ystod y flwyddyn ddiwethaf i’w galluogi i wneud addasiadau a chyflwyno ystod o fesurau i gadw unigolion yn ddiogel.”