Mae Urdd Gobaith Cymru a Choleg Brenhinol Cerdd a Drama Cymru (CBCDC) yn falch o gyhoeddi enwau chwe gwobr newydd sbon i gystadleuwyr sy’n serennu ar lwyfan Eisteddfod yr Urdd eleni, gyda chefnogaeth rhai o dalentau mwyaf Cymru.
Bydd y gwobrau newydd yn cynnwys sesiynau mentora i chwe unigolyn 19-25 oed gyda Syr Bryn Terfel, yr actor Matthew Rhys, y ddawnswraig broffesiynol Amy Dowden (Strictly Come Dancing), y feiolinydd Rakhi Singh, yr enillydd BAFTA Callum Scott Howells (It’s a Sin) ac un o reolwyr digwyddiadau fwyaf profiadol Cymru, Sarah Hemsley-Cole.
Mae enwau’r gwobrau newydd fel a ganlyn:
- Gwobr Syr Bryn Terfel (lleisiol)
- Gwobr Amy Dowden (dawns)
- Gwobr Callum Scott Howells (sioe gerdd)
- Gwobr Matthew Rhys (theatr)
- Gwobr Rakhi Singh (offerynnol)
- Gwobr Sarah Hemsley-Cole (cefn llwyfan)
Bydd pob enillydd hefyd yn derbyn cefnogaeth ariannol tuag at hyfforddiant pellach ynghyd â chyfle i arddangos eu talent i gynulleidfa fyd-eang mewn digwyddiadau mawreddog yn ystod y flwyddyn.
Cynhelir Eisteddfod yr Urdd Dur a Môr 2025 rhwng y 26ain a’r 31ain o Fai ym Mharc Margam ac mae angen i gystadleuwyr 19-25 oed gofrestru i gystadlu erbyn 3 o Fawrth 2025. Bydd tîm o feirniaid sy’n cynrychioli’r Urdd a CBCDC yn bresennol yn yr ŵyl i benderfynu ar y chwech buddugol, a’r enwau’n cael eu cyhoeddi’n fyw ar S4C ar ddiwrnod olaf y cystadlu.
Cystadlaethau sy’n gymwys –
Gwobr Bryn Terfel
21 Unawd 19–25 oed
41 Cyflwyno Alaw Werin Unigol 19–25 oed
90 Unawd Cerdd Dant 19–25 oed
Gwobr Amy Dowdon
111 Dawns Stepio Mewn Arddull Draddodiadol Merched Bl.10 ac o dan 25 oed
112 Dawns Stepio Mewn Arddull Draddodiadol Bechgyn Bl.10 a dan 25 oed
393 Dawns unigol 19-25 oed mewn unrhyw arddull ac eithrio Dawnsio Gwerin
Gwobr Matthew Rhys
136 Llefaru Unigol 19–25 oed – Gwobr Matthew Rhys
161 Monolog 19-25 oed – Gwobr Matthew Rhys
Gwobr Rakhi Singh
72 Unawd Offerynnol 19–25 oed
Gwobr Callum Scott-Howells
163 Perfformiad o Gân Sioe Gerdd 19-25 oed
Gwobr Sarah Hemsley-Cole
394 Portffolio Cefn Llwyfan 19-25 oed