Mae Hannah yn gweithio ym Meithrinfa Ffalabalam, Bangor, a dyma oedd gan ei rheolwr i ddweud: “Mae Hannah yn weithiwr caled ac yn dda iawn hefo'r plant i gyd.  Unwaith yr wythnos mae hi yn gweithio hefo plentyn ifanc hefo anghenion dysgu ychwanegol. Mae Hannah wedi gweithio yn agos hefo’r rhieni ac asiantaethau allanol i helpu creu cynllun i helpu’r plentyn addasu i'r feithrinfa. Pan fod angen, mi ydyn yn gallu rhoi Hannah yng ngofal unrhyw oedran ac mae hi yn gallu addasu ei ffordd o weithio hefo'r plant.” 

Pam wnaethost ti benderfynu ymgymryd â phrentisiaeth gyda’r Urdd?  

Dechreuais y cymhwyster Lefel 2 Gofal Plant i ddysgu sgiliau newydd fel y gallaf ddatblygu fy ngallu ar gyfer y dyfodol.  Trwy ei gwblhau wrth weithio gallaf gael profiadau ymarferol gyda chyngor a gwybodaeth gan fy asesydd a bod mewn swydd rwy'n ei fwynhau. 

Beth wyt ti’n mwynhau mwyaf am dy swydd a sut mae’r brentisiaeth wedi effeithio ar dy swydd?  

Rwyf wrth fy modd bod pob diwrnod yn wahanol.  Mae’n fy ngalluogi i fod yn greadigol gyda’r plant drwy wneud crefft a chwarae a bod yn rhan o’u dysgu a’u datblygiad. Drwy gwblhau’r brentisiaeth, mae'n gwneud i mi feddwl mwy am bopeth rydw i'n ei wneud hefo’r plant a hefyd yr hyn y gallaf ei gyflawni yn fy nyfodol a'r hyn y gallaf ei wneud i wella fy ngwaith a sgiliau. 

Beth mae ymgymryd â phrentisiaeth trwy gyfrwng y Gymraeg yn meddwl i ti?  

Mae gallu ei wneud yn ddwyieithog yn fy ngalluogi i ddatblygu fy ngwaith ysgrifenedig Cymraeg. 

Beth yw dy ddiddordebau tu allan i’r gwaith?  

Rwy'n mwynhau bod yn yr awyr agored, yn enwedig ger llynnoedd a choedwigoedd gyda ffrindiau sydd wedi datblygu diddordeb mawr mewn ffotograffiaeth. 

Ym mha ffordd mae gwneud y brentisiaeth wedi effeithio ar dy ddatblygiad personol di?  

Mae wedi rhoi hyder i mi yn y ffordd rydw i'n gweithio.  Rwyf wedi dysgu llawer am yr hyn sydd ei angen i ddeall meddwl plentyn a'r hyn sydd ei angen i fod y person sydd ei angen arnynt i'w helpu i dyfu, dysgu a theimlo'n ddiogel. 

Beth wyt ti’n gobeithio gwneud ar ôl cwblhau’r brentisiaeth?  

Rwy’n gobeithio datblygu fy nysgu drwy barhau â’m hyfforddiant ac un diwrnod byddwn wrth fy modd yn trio rôl 1 wrth 1. 

Disgrifia yn fras dy dyletswyddau.  

Mae fy nyletswyddau'n cynnwys diogelu, lles a sicrhau bod pob plentyn yn teimlo'n ddiogel ac yn cael eu clywed. Rwy’n caniatáu iddynt deimlo'n hyderus yn eu dysgu a'u datblygiad a'u cefnogi yn eu cyflawniadau. 

Disgrifia dy brofiad o wneud prentisiaeth mewn 3 gair! 

Hwyl, dysgu, twf  

Hoffet ti ychwanegu rhywbeth ynglŷn â dy stori? Sut wyt ti wedi cyrraedd ble wyt ti nawr? Beth oedd / yw dy her fwyaf?  

Rwy’n ddiolchgar am y cyfle a roddwyd i mi.  Rwy’n cael ennill cymhwyster, dysgu a thyfu trwy waith.