Côr yr Urdd: Aelwyd Hafodwenog yn Lyon
Teithiodd dros 40 o aelodau'r Urdd i Lyon ar gyfer gêm Cymru v Awstralia er mwyn cynrychioli'r mudiad a Chymru.
Yn arwain fyny i'r gêm gwahoddwyd y côr i'r Pentref Rygbi er mwyn perfformio i fans Cymru, Awstralia a chyhoedd Lyon. Llwyddodd y côr i godi'r awyrgylch yn y Pentref Rygbi gyda'u dawnsio clocsio egnïol, a chafwyd ymateb emosiynol i'w perfformiadau, yn enwedig Calon Lân a chyfieithiad i'r Gymraeg o 'World in Union'.
Ar ôl diwrnod llwyddiannus yn y Pentref Rygbi, cafodd y côr y cyfle arbennig i berfformio i dîm Rygbi Cymru a'u teuluoedd fel oeddent yn gadael y gwesty i'r gêm. Dyma oedd gan un o aelodau o'r côr i'w ddweud am y profiad:
"Roedd pawb yn hynod gyffrous am y gêm ac roedd y profiad o gael canu iddyn nhw ychydig cyn hynny’n eithaf emosiynol."
Ac wrth gwrs i gloi'r diwrnod arbennig - aeth yr holl aelodau i'r stadiwm i brofi Cymru yn ennill yn erbyn Awstralia yng Nghwpan y Byd!
Cyn teithio adref, cafwyd ymweliad arbennig i ysgol leol yn Lyon. Yno wnaeth y côr berfformio i'r bobl ifanc o Lyon ac wedyn eu dysgu sut i ganu anthem Cymru ac ychydig o ddawnsio gwern a chlocsio. Profiad bythgofiadwy i rannu'r iaith Gymraeg a'r diwylliant gyda'r Ffrancwyr.
Galeri Taith Hafodwenog
Chwarae Yn Gymraeg: Lorient a Nantes
Fel rhan o’r paratoadau ar gyfer gêm Cymru v Georgia yn Nantes, cynhaliwyd sesiynau ‘Chwarae yn Gymraeg’ mewn ysgolion cynradd yn Lorient a Nantes gan staff chwaraeon a chelfyddydol yr Urdd. Wedi’i greu gan yr Urdd, mae ‘Chwarae yn Gymraeg’ yn rhaglen sy’n cyflwyno’r iaith a’r diwylliant Cymraeg i blant mewn ffordd hwyliog: trwy chwarae a gweithgareddau amrywiol.
Dros gyfnod o wythnos llwyddodd staff yr Urdd i ymweld â 8 o ysgolion yn Llydaw. Roedd yn brofiad arbennig i bawb wrth rannu'r iaith Gymraeg a diwylliant Cymreig gyda plant ac athrawon Lorient a Nantes, ond hefyd i ddysgu mwy am draddodiadau Llydaweg.
Yn dilyn llwyddiant y daith, hoffai'r Urdd ddatblygu ei pherthynas gyda Llydaw, gyda'r gobaith o deithio yno eto yn fuan.
Galeri Taith Chwarae Yn Gymraeg
Gŵyl Interceltique Lorient
Fel rhan o brosiect rhyngwladol yr Urdd sy’n rhannu ein hiaith a’n diwylliant, bydd tri o brosiectau’r Urdd yn teithio i ŵyl Interceltique Lorient a gynhelir rhwng 12 a 18 Awst. Mae’r ŵyl yn denu dros 700,000 o ymwelwyr yn flynyddol i fwynhau cerddoriaeth a diwylliant Celtaidd. Thema’r ŵyl eleni yw ieuenctid, ac mae’r Urdd am y tro cyntaf wedi cael gwahoddiad i fod yn rhan o bethau.
Yn dilyn proses ymgeisio agored, dewiswyd Aelwyd yr Ynys fel y côr llwyddiannus fydd yn perfformio yn enw’r Urdd yn yr ŵyl. A diolch i gefnogaeth ariannol cynllun TAITH bydd dau brosiect arall gan yr Urdd yn cael y cyfle i deithio, sef prosiect Twmpdaith a Phrosiect Plethu.
Mae Twmpdaith yn brosiect a drefnir gan gynllun ‘Brosiect Wyth’ i hyrwyddo dawnsio Cymreig traddodiadol ymysg cynulleidfa iau yng Nghymru. Treialwyd y cynllun yn 2023 ac mae nôl eto eleni gan gynnig cyfle i 9 cerddor ifanc weithio dros fisoedd yr haf yng Nghymru gan gynnal Twmpathau amrywiol ar hyd a lled Cymru gyda penllanw teithio i Lorient i berfformio a dysgu o rai o draddodiadau Celtaidd eraill.
Mae’r Prosiectau Plethu yn dod â grwpiau o bobl ifanc ar draws Cymru at eu gilydd i gydweithio ac i arbrofi gyda’r celfyddydau i greu perfformiadau a chelfyddyd. yn rhan o'r prosiect yma ydy Ysgol Uwchradd Fitzalan a Clocswyr Conwy sy’n plethu stepio traddodiadol Cymreig gyda dawnsio Bollywood a Roma. Mae'r rhythmau, a phatrymau amrywiol yn creu gwledd i'r llygaid a'r clustiau. Mae'r criw o bobl ifanc wedi rhannu eu traddodiadau eu hunain i greu asiad cyfoes sy'n arddangos hunaniaeth.
Y tri prosiect
