Pam ymweld?

Am genedlaethau, mae ysgolion wedi ymddiried yn yr Urdd i ddarparu profiadau cofiadwy y tu hwnt i’r ystafell ddosbarth.

O antur a dysgu i’r Gymraeg a diwylliant, mae pob ymweliad yn helpu pobl ifanc i fagu hyder.

Teithiau Ysgol

Gwybodaeth ddefnyddiol

Gwybodaeth ar gyfer ysgolion sy’n ystyried trefnu taith i Wersyll Llangrannog.

Ers 1932, mae Canolfan yr Urdd Llangrannog wedi gweithredu ar egwyddor Dysgu Trwy Weithgarwch, ac mae hyn wedi profi’n effeithiol wrth ddatblygu hyder a hunan-gred unigolion. Gellir dweud yn wir nad oes ystafell ddosbarth well na Chanolfan yr Urdd, Llangrannog!

Rydym yn manteisio’n llawn ar yr amgylchedd naturiol a’r hanes diwylliannol sydd o’n cwmpas er mwyn cynnig ystod eang o gyrsiau. Mae awyrgylch unigryw Cymreig y Ganolfan yn ei gwneud yn lleoliad delfrydol ar gyfer cyrsiau iaith, ac mae’n un o’r rhesymau pam mae 96% o ysgolion yn gweld gwelliant yn agwedd eu disgyblion tuag at y Gymraeg a diwylliant Cymru yn dilyn eu harhosiad.

Mae dwyieithrwydd yn rhan annatod o brofiad Llangrannog ac yn fantais ychwanegol i’r amrywiaeth o gyrsiau a gynigir yma, gan gynnwys cyrsiau gweithgareddau, daearyddiaeth, hanes, llenyddiaeth, celf a llawer mwy.

Fel arfer rydym yn cynnig cyrsiau 2 noson, 4 noson a chyrsiau penwythnos.

Unwaith y byddwch wedi dewis eich dyddiadau, gallwch ddechrau cynllunio eich rhaglen gyda chymorth ein cydlynydd cyrsiau er mwyn sicrhau eich bod yn cyflawni eich deilliannau dysgu. Caiff rhaglen ei llunio rhwng 9:00yb a 10:00yh.

Mae amrywiaeth eang o weithgareddau ar gael, dan arweiniad ein staff cymwys a phroffesiynol. Gallwn hefyd drefnu gweithgareddau môr ac afon gyda phartneriaid lleol, megis syrffio, arfordiro a chanŵio (am gost ychwanegol).

Gallwn drefnu gweithgareddau dan do mewn tywydd garw, er bod rhai gweithgareddau hyd yn oed yn fwy pleserus yn y glaw! Boed hi’n bwrw glaw neu’n heulog, yn oer neu’n gynnes, byddwn yn sicrhau bod gennych bopeth sydd ei angen arnoch.

Gellir addasu pob gweithgaredd i weddu i unrhyw oedran ac unrhyw anghenion. Mae ein datganiad cwricwlwm yn amlinellu manteision addysgol y gwahanol weithgareddau.

Yn ystod y nosweithiau, mae amrywiaeth o weithgareddau ar gael, ac mae aelodau o staff ar gael i gefnogi grwpiau gyda’r amserlen.

Trefnu trafnidiaeth ar eich rhan.

Helpu i hyrwyddo’r daith i rieni a phlant, boed hynny drwy ymweliadau ysgol, taflenni neu lythyrau templed.

Darparu cardiau casglu.

Darparu taflenni gwybodaeth cyffredinol i rieni, gan gynnwys beth i’w bacio a gwybodaeth ddefnyddiol arall (gweler ein rhestr o Ddogfennau Defnyddiol).

Mae amser bwyd yn aml yn uchafbwynt y profiad yn Llangrannog! Ceir digon o ddewis, gyda phrydau llysieuol ar gael ym mhob amser bwyd.

Ym mhob pryd bwyd rydym yn darparu:

  • 2 opsiwn pryd poeth (heb gynnwys yr opsiwn llysieuol)
  • Bar salad gyda dewis eang o saladau ffres
  • Pwdin poeth neu hufen iâ yn ystod yr haf
  • Digonedd o ffrwythau ffres ar gael bob amser.

Rydym yn deall y gall amser bwyd fod yn destun pryder i blant a rhieni, ac fe wnawn bopeth o fewn ein gallu i helpu.

Gallwn ddarparu ar gyfer y gofynion dietegol canlynol, a llawer mwy:

  • Llysieuol
  • Fegan
  • Diabetig (cysylltwch â ni am fwydlen cyfrif carbohydradau)
  • Heb glwten
  • Halal
  • Alergeddau bwyd (mae’r fwydlen yn darparu gwybodaeth am 14 alergen Asiantaeth Safonau Bwyd)

Darperir dewisiadau amgen di-laeth, a gellir darparu cynhyrchion soi ar gais.

Gallwn addasu a darparu opsiynau gwahanol os caiff hyn ei drafod ymlaen llaw.

Nodwch bob gofyniad dietegol ar y Ffurflen Iechyd. Os hoffech drafod unrhyw ofynion cyn yr ymweliad, cysylltwch â ni.

Cysylltu â ni

Os hoffech gael copi o’r fwydlen ar gyfer cyfnod ymweliad eich plentyn, neu os hoffech drafod opsiynau dietegol, cysylltwch â Gareth, Pennaeth Arlwyo, ar:

Diodydd a safonau hylendid

Mae ffrwythau ffres, dŵr a sgwash ar gael yn rhad ac am ddim bob amser.

Mae’r Ganolfan wedi derbyn Sgôr Hylendid Bwyd o 5, sef y sgôr uchaf o dan Gynllun Sgorio Hylendid Bwyd Asiantaeth Safonau Bwyd.

Rydym yn falch iawn o’n enw da ym maes Iechyd a Diogelwch, ac rydym yn credu mai dyma un o’r rhesymau pam mae 84% o’n hymwelwyr yn dychwelyd i aros yn y Gwersyll dro ar ôl tro. Mae gennym systemau a gweithdrefnau cadarn ar waith i sicrhau diogelwch plant, athrawon ac oedolion drwy gydol eu harhosiad.

Ein systemau diogelwch:

  • 3 rhwystr diogelwch a system CCTV
  • Gwarchodwyr nos ar ddyletswydd
  • DBS (Gwasanaeth Datgelu a Gwahardd): Mae pob aelod o staff wedi cwblhau gwiriad manwl DBS
  • Staff gweithgareddau cymwysedig a phrofiadol. Mae’r Gwersyll wedi ennill statws Buddsoddwyr mewn Pobl (Investors in People) ac wedi derbyn gwobr Cyflogwr y Flwyddyn yng Ngwobrau Cwlwm Busnes Ceredigion
  • Diogelwch Tân: Cynhelir ymarfer tân cyn gynted â phosibl ar ôl i’r plant gyrraedd y Gwersyll. Mae ystafelloedd gyda larwm tân gweledol ar gael i unigolion sydd â nam ar eu clyw
  • Cymorth Cyntaf: Mae Swyddogion Cymorth Cyntaf cymwys ar alwad 24 awr y dydd
  • Ystafell Cymorth Cyntaf benodol a lle diogel lle cedwir meddyginiaeth dan glo
  • Ffurflenni Iechyd: Mae rhieni yn cael cyfle i roi gwybod am unrhyw anghenion ychwanegol Darperir y Ffurflen Iechyd gan yr ysgol neu arweinwyr y grŵp
  • Mae systemau penodol ar waith ar gyfer alergeddau bwyd, a darperir bwydlen sy’n addas ar gyfer pob gofyniad dietegol
  • Asesiadau Risg ar gyfer pob gweithgaredd
  • Swyddog NEBOSH amser llawn sy’n gyfrifol am Iechyd a Diogelwch yn y Gwersyll.

Mae lles, iechyd a diogelwch pob ymwelydd yn flaenoriaeth, ac mae ein staff a’n systemau yn gweithio gyda’i gilydd i sicrhau profiad diogel a phleserus i bawb.

Rydym yn ymfalchïo mewn bod yn gynhwysol ac yn hygyrch i blant ac oedolion o bob gallu.

Ceir dogfennau defnyddiol isod sy’n cynnig rhagor o wybodaeth am hygyrchedd a’r gefnogaeth sydd ar gael yn y Gwersyll.

Maent yn fan cychwyn gwych os ydych yn poeni am unrhyw agwedd ar arhosiad preswyl eich plentyn neu os hoffech gael rhagor o wybodaeth cyn penderfynu ymweld.

Rydym yn darparu:

  • Ystafelloedd hygyrch (gweler y Datganiad Mynediad Safle am fwy o wybodaeth).
  • Ystafelloedd ymolchi hygyrch.
  • Cadair lifftiau.
  • Lifftiau i’r prif ardaloedd ar y safle os nad ydynt ar lefel y ddaear.
  • Addasiadau i weithgareddau i sicrhau bod pawb yn gallu cymryd rhan (gweler y ddogfen Hygyrchedd Gweithgareddau am fwy o fanylion).

Hyfforddiant staff

Er mwyn sicrhau cynhwysiant a mynediad i bawb, mae ein staff wedi derbyn yr hyfforddiant canlynol:

  • Hyfforddiant Hygyrchedd ac Anabledd gan Anabledd Chwaraeon Cymru.
  • Hyfforddiant Chwaraeon a Chwarae Hygyrch gan Anabledd Chwaraeon Cymru.
  • Hyfforddiant Ymwybyddiaeth Hil gan No Boundaries.
  • Hyfforddiant Ymwybyddiaeth LGBTQ+ gan Gisda.

Ein nod yw sicrhau bod pob ymwelydd yn teimlo’n groesawgar, yn ddiogel ac yn gallu mwynhau’r profiad yn llawn, waeth beth fo’u hanghenion neu eu gallu.

Gwybodaeth ddefnyddiol i rannu gyda rhieni

Gwybodaeth i rannu gyda rhieni i baratoi ar gyfer taith i Langrannog.

  • Sach gysgu
  • Dillad nos a phethau ymolchi
  • Dillad sbâr (nid y rhai gorau)
  • Siwmper gynnes ac anorac neu got law
  • Dillad chwarae, gwisg nofio a thywelion
  • Esgidiau ymarfer neu esgidiau addas ar gyfer cerdded, a hen bâr o esgidiau neu esgidiau glaw ar gyfer marchogaeth a beiciau modur
  • Dillad addas ar gyfer sgïo a thoboganu, e.e. hen fenig a hen dracsŵt neu jîns. (Nid ywtracsŵt gyda botymau popper yn addas)
  • Pensil a llyfr nodiadau (ar gyfer cyrsiau yn unig)

Mae hen ddillad iawn ar gyfer ein Cwrs Antur Mwdlyd (Ebrill – Hydref). Dylid anfon hen ddillad ar gyfer y gweithgaredd hwn, sef dillad nad oes ots gennych eu bod yn mynd yn fudr iawn neu hyd yn oed yn cael eu taflu i ffwrdd ar ôl y gweithgaredd neu ar ôl dychwelyd adref, gan fod y gweithgaredd hwn yn un mwdlyd iawn, ond yn llawn HWYL! Darperir bag ar gyfer y dillad budr ar ôl y weithgaredd.

PWYSIG
Dylech sicrhau bod enw wedi’i nodi ar bob eitem o ddillad (yn enwedig dillad nofio), gan fod nifer fawr o eitemau heb eu labelu yn cael eu gadael ar ôl bob wythnos.

Mae’n bwysig bod pob plentyn yn dod â’r Dystysgrif Iechyd i’r gwersyll, gyda manylion unrhyw salwch neu gyflwr iechyd sydd ganddynt, ynghyd â rhif ffôn cyswllt rhag ofn y bydd angen cysylltu â’r rhieni neu’r teulu.

Peidiwch â chaniatáu i’r plant ddod â radio neu chwaraewr cerddoriaeth personol (e.e. iPod), gemau fideo neu deganau drud, tortsh na ffôn symudol (nid oes derbyniad ffôn yn yr ardal) i’r gwersyll.

Hefyd, oherwydd rheoliadau Iechyd a Diogelwch, ni chaniateir y canlynol:

  • Cyllell boced
  • Chwistrellau aerosol (dewch â diaroglydd rôl yn lle hynny)
  • Offer trydanol cludadwy:
  • Sychwyr gwallt
  • Chwaraewyr cerddoriaeth mawr (ghetto blasters)
  • Gefeiliau cyrlio
  • Heirn teithio

Os bydd plant yn dod â’r eitemau personol hyn gyda nhw, cânt eu casglu ar ddechrau’r cwrs a’u dychwelyd ar y diwedd.

Gellir gadael unrhyw eitemau gwerthfawr eraill yn y dderbynfa er mwyn eu cadw’n ddiogel, er enghraifft camerâu.

PWYSIG

Ni fyddwn yn gyfrifol am unrhyw golled neu ddifrod i’r eitemau uchod yn y gwersyll.

Gofynnwn yn garedig i chi beidio â threfnu i’ch plentyn ffonio adref ar ddechrau’r cwrs. Os nad ydych yn clywed gennym, gallwch fod yn dawel eich meddwl bod eich plentyn yn ddiogel ac yn iawn.

Byddwn yn cysylltu â chi ar unwaith os bydd unrhyw broblem yn ymwneud ag iechyd neu hiraeth. Os oes gennych neges i’ch plentyn, mae croeso i chi gysylltu â’r Dderbynfa ar 01239 652140 neu drwy e-bost ar Llangrannog@urdd.org.

Bydd Cyfarwyddwr y gwersyll yn sicrhau bod y neges yn cael ei throsglwyddo i’ch plentyn.

Mae aelod o staff yr Urdd ar gael 24 awr y dydd drwy gydol arhosiad y plant. Felly, os bydd gan blentyn unrhyw broblemau neu bryderon, bydd aelodau o staff wrth law i ddelio ag unrhyw faterion yn brydlon ac yn effeithiol.

Mae lles, diogelwch a hapusrwydd y plant yn flaenoriaeth i ni, a bydd ein staff profiadol yn sicrhau bod unrhyw broblem yn cael ei datrys cyn gynted â phosibl.

Bydd pob plentyn yn cysgu mewn ystafelloedd gwely â gwres canolog. Y plant eu hunain sy’n gyfrifol am wneud eu gwelyau a chadw eu hystafelloedd yn daclus.

Rydym yn sicrhau bod pob plentyn yn gwybod ble i gael cymorth yn ystod y nos gan aelodau o staff sydd gerllaw ac ar gael i helpu ar unrhyw adeg.

Mae goleuadau’r coridorau ymlaen drwy gydol y nos er mwyn sicrhau amgylchedd diogel a chyfforddus.

Darperir clustogau ewyn i bob plentyn.

Dogfennau defnyddiol

Ymholi am ddyddiad i’ch ysgol

Awydd ymweld â ni’n Llangrannog?

Ffoniwch ni ar 01239 652 140 neu e-bostiwch â chroeso!

E-bostiwch ni