Plant yn eu hetiau diogelwch yn mwynhau gweithgareddau Llangrannog

Gwyliau i’w gofio

Mae ein Gwersylloedd Haf yn un antur fawr o’r dechrau i’r diwedd.

Gyda gweithgareddau di-stop, ffrindiau newydd, profiadau anhygoel a gofal arbenigol 24/7 gan ein timau ymroddedig. Mae’n hawdd gweld pam mai ni yw’r dewis cyntaf i rieni yng Nghymru!

Archebion yn agor: 28 Ionawr 2027

Cwestiynau cyffredin

Ers y 1930au mae miloedd o blant a phobl ifanc Cymru wedi cael budd o fynychu Gwersylloedd Haf yr Urdd.

Dyma gyfle i’ch plentyn fwynhau gwyliau annibynnol i ffwrdd o adref dan ofal staff profiadol yr Urdd (24 awr y dydd).

Dewiswch o 17 gwersyll sydd yn cael eu cynnal drwy gydol gwyliau’r haf ar gyfer plant o 8-18 oed ar safleoedd pedwar o Wersylloedd yr Urdd.

Mae’r gweithgareddau yn amrywio ym mhob gwersyll. O wersylloedd yn llawn antur i wersylloedd creu, perfformio, natur a lles – mae rhywbeth i bawb.

Pentre Ifan

Mae gwersyll Pentre Ifan yn canolbwyntio ar natur, yr amgylchedd a lles plant a phobl ifanc. Yn cynnig profiadau hudolus rhwng môr a mynydd yng ngogledd Sir Benfro. Mae gweithgareddau gwersylloedd haf Pentre Ifan yn cynnwys yoga, meddylgarwch, serydda, SUP, dro i fynyddoedd y Preseli a llawer mwy.

Caerdydd

Wedi’i leoli ym Mae Caerdydd; dan do Canolfan Mileniwm Cymru, mae gwersylloedd haf Caerdydd yn cynnig profiad dinesig i’ch plentyn. Gyda cwrs creu a perfformio wedi’i deilwra yn arbennig ar gyfer plant sy’n diddori mewn creu, cyfansoddi a perfformio. Mae amserlen y gweithgareddau yn llawn o dripiau i atyniadau mwyaf Caerdydd, fel Stadiwm Principality, Castell Caerdydd a gweithgareddau hwyliog fel nofio a bowlio 10.

Glan-llyn

Ar lannau Llyn Tegid ym Mharc Cenedlaethol Eryri, mae Glan-llyn yn arbenigo mewn gweithgareddau awyr agored o’r safon uchaf. Mae gwersylloedd haf Glan-llyn yn cynnig amrywiaeth o weithgareddau dŵr a thir, gan gynnwys canŵio, dringo a rhaffau uchel, a gweithgareddau dan do fel saethyddiaeth a nofio.

Llangrannog

Yn edrych dros fae godidog Ceredigion, mae Gwersyll Llangrannog wedi’i leoli ar lwybr arfordir Cymru. Yn arbenigo mewn gweithgareddau antur, mae cyfle i wibio lawr llethr sgïo, rasio ceirt modur, mentro ar y cwrs rhaffau neu fwynhau taith ar gefn y merlod. Mae digon i’w wneud yma dan do hefyd, o’r pwll nofio i’r wal ddringo.

Mae’r prisiau’n amrywio yn ddibynnol ar hyd y cwrs, y lleoliad a’r rhaglen o weithgareddau. Mae’r prisiau ar gael i’w gweld wrth glicio ‘Mwy o wybodaeth’ ar bob cwrs penodol.

Byddwn yn gofyn am flaendal o £50 wrth archebu ac mae cynllun rhandaliadau ar gael.

Mae popeth yn rhan o’r pris – llety, bwyd, gweithgareddau a gofal 24 awr y dydd.

Gellir trefnu cludiant bws am bris ychwanegol – mi fydd manylion yn dilyn ar ôl archebu.

Y Gymraeg yw iaith gwersylloedd haf yr Urdd.

Mae gwersylloedd penodol i ddysgwyr Cymraeg. Yr ethos yw i ddysgu trwy weithgareddau a phrofiadau sy’n cyfoethogi dysgwyr mewn amgylchedd Cymreig lle mae’r Gymraeg yn iaith fyw.

Os yw eich plentyn yn dysgu Cymraeg rydym yn argymell eich bod yn ei cofrestru ar gyfer cwrs i ddysgwyr.

Mae’r holl weithgareddau yn cael eu arwain a’u cynnal dan oruchwyliaeth staff profiadol a chymwys yr Urdd.

Bydd eich plentyn yn derbyn gofal 24 awr y dydd. Rydym yn sicrhau bod y plant bob amser yn gwybod ble i droi mewn argyfwng, yn ystod y dydd a nos. Mae gwyliwr nos ar ddyletswydd trwy gydol y nos. Yn ogystal, mae camerâu diogelwch yn ein safleoedd. Mae gan ystafelloedd a choridorau system gardiau allwedd electronig unigryw i sicrhau diogelwch. Mae holl staff gwersylloedd yr Urdd wedi cael ymchwiliad Gwasanaeth Datgelu a Gwahardd (DBS).

Mae rhieni yn adrodd nôl o flwyddyn i flwyddyn bod ein “staff yn gefnogol, yn gyfeillgar ac yn broffesiynol” – mae eich plentyn mewn dwylo saff.

Gall rhieni, warchodwr neu athrawon wneud cais i’r gronfa i dalu am wyliau yn un o wersylloedd haf yr Urdd i blentyn neu berson ifanc sy’n gymwys.

Manylion pellach ar gael yma.

Plant yn mwynhau ar y dwr yng Nglan-llyn

Mae pob gwersyll yn cynnig profiad gwahanol

Gall un gwersyll olygu treulio’ch dyddiau ar y dŵr, yn dringo ac yn archwilio’r awyr agored. Gall un arall ganolbwyntio ar gerddoriaeth, perfformio, codio, cadwraeth neu ddarganfod rhywle newydd.

Mae rhai gwersylloedd yn para ychydig ddyddiau, tra bo eraill yn cynnig profiad preswyl hirach. Mae dewisiadau ar gael ar gyfer gwahanol oedrannau, diddordebau a lefelau o Gymraeg, gan gynnwys gwersylloedd sydd wedi’u creu’n arbennig ar gyfer dysgwyr.

Yr hyn sy’n gyffredin iddynt yw’r cyfle i gael seibiant o’ch trefn arferol, treulio amser gyda phobl ifanc eraill a bod yn rhan o brofiad cofiadwy.

“Roedd hi wedi mwynhau y profiad o gael cyfansoddi a chwarae offerynnau ac roedd y staff yn glên ac yn wybodus iawn.”

“Roedd y staff wedi ei thrin fel person ifanc yn hytrach na fel plentyn, ac wedi gwrando arni a pharchu ei barn. Roedd cyd-bwysedd da rhwng ‘arwain’ y bobl ifanc a gadael iddynt ffeindio eu ffordd eu hunain.”

“Fel teulu sy ddim yn byw yng Nghrymu, mae’r cyrsiau’n rhoi cyfle amhrisiadwy i’r plant gadw eu Cymraeg a’u hoffter o ddiwylliant Cymreig.”

Baner Glas yr Urdd yn chwifio o flaen Canolfan y Mileniwm

Eisiau cysylltu â ni?

Peidiwch â dal yn ôl – cysylltwch i drafod ein Gwersylloedd Haf!