Taith #FelMerch i India

Taith #FelMerch yr Urdd i India – Chwefror 2027

Yn dilyn llwyddiant ymweliadau #FelMerch yr Urdd â Kolkata, India, yn 2025 a 2026, mae’r Urdd yn falch iawn o allu cynnig cyfle unigryw unwaith eto i 10 o ferched rhwng 18 a 25 oed, sy’n aelodau o’r Urdd, i ymweld â Kolkata am bythefnos ym mis Chwefror 2027.

Bydd y daith yn cael ei threfnu mewn partneriaeth gyda Her Future Coalition – elusen sy’n gweithio yn India i wneud newidiadau cadarnhaol ym mywydau menywod a merched sydd wedi bod, neu sydd mewn perygl o gael eu tynnu i mewn i gaethfasnach rywiol. Mae’r elusen yn ceisio torri’r cylch tlodi drwy ddarparu addysg, hyfforddiant, a gwasanaethau cymorth i helpu merched i adeiladu dyfodol mwy diogel a disglair.

Yn ystod y daith, bydd y merched yn cael cyfle i ymgysylltu’n uniongyrchol â chymunedau mewn rhai o’r ardaloedd mwyaf difreintiedig yn India. Bydd yr amserlen yn llawn profiadau bythgofiadwy.

Bydd Her Future Coalition yn gweithio law yn llaw gyda’r Urdd i drefnu’r daith a’r gweithgareddau, gan sicrhau bod y merched yn gweithio mewn amgylchedd diogel a chefnogol. Bydd y cyfranogwyr yn cael y cyfle i wneud gwir wahaniaeth, datblygu dealltwriaeth ddyfnach o faterion byd-eang, ac ennill profiad personol a fydd yn eu hysbrydoli am oes.

Dydd Llun – 15 Chwefror – Dydd Gwener 26 Chwefror 2027

Bydd y daith hon yn cael ei hariannu’n llawn gan Lywodraeth Cymru ac Urdd Gobaith Cymru.
Diolch yn fawr iawn i Lywodraeth Cymru am gefnogi’r prosiect unwaith eto eleni.

Ni fydd unrhyw gost uniongyrchol i’r cyfranogwyr am deithio, llety, bwyd nac yswiriant – gan wneud hwn yn gyfle hollol unigryw a gwerthfawr.

Bydd disgwyl i’r ymgeiswyr llwyddiannus fynychu penwythnos preswyl yng Ngwersyll Caerdydd ar 28 a 29 Tachwedd 2026.

Gweithdy i gychwyn am 9 fore Sadwrn, 28 Tachwedd, gyda’r opsiwn o aros yng Ngwersyll Caerdydd ar 27 Tachwedd.

Bydd hwn yn gyfle:

I ddod i adnabod aelodau eraill o’r grŵp
I drafod logisteg ac unrhyw bryderon
I gymryd rhan mewn gweithdai paratoi ymarferol a diwylliannol

Fel rhan o bartneriaeth yr Urdd gyda Her Future Coalition, bydd disgwyl i’r merched sy’n cymryd rhan yn y daith gynnal ymgyrch codi arian cyn teithio.

Bydd yr arian a godir yn cael ei gyflwyno’n uniongyrchol i’r elusen yn ystod y daith – gan wneud gwahaniaeth gwirioneddol i’r cymunedau lle bydd y grŵp yn gweithio.
Dros y ddwy flynedd diwethaf, llwyddodd y criw i godi dros £13,000, gan helpu i ddarparu adnoddau hanfodol, offer dysgu ac adnoddau cymorth i ferched a phlant mewn sefyllfaoedd bregus.