Unwaith eto eleni, cafodd deg o ferched ifanc yr Urdd y cyfle i deithio ar daith ddyngarol i India, gan barhau i feithrin perthynas agos gyda’r elusen Her Future Coalition. Mae’r elusen yn gweithio i adeiladu dyfodol disglair ac annibynnol i oroeswyr a’r merched mwyaf bregus yn India a Nepal. Ers 2005, mae Her Future wedi bod yn creu newid pwerus drwy dorri’r cylch o dlodi ac ecsbloetio, gan ddarparu addysg a’r gwasanaethau hanfodol sy’n eu galluogi i adeiladu bywydau mwy diogel ac ystyrlon.
Dyma’r ail flwyddyn i’r daith gael ei chynnal, ac rydym yn ddiolchgar iawn i Lywodraeth Cymru am ei hariannu unwaith eto.