Prosiectau Rhyngwladol

Mae Tîm Rhyngwladol yr Urdd, sy’n rhan o’r Adran Cyfathrebu a Rhyngwladol, yn creu cyfleoedd i aelodau brofi’r byd, cynrychioli Cymru a ffurfio cysylltiadau â phobl ifanc mewn gwledydd eraill.

Mae’r gwaith yn llawer mwy na theithio. Drwy bartneriaethau â mudiadau ieuenctid, elusennau, prifysgolion a chymunedau ledled y byd, mae aelodau’n cael cyfleoedd i berfformio, gwirfoddoli, dysgu, rhannu’r Gymraeg a chydweithio ar draws ieithoedd a diwylliannau.

Mae edrych y tu hwnt i Gymru wedi bod yn rhan o weledigaeth yr Urdd ers ei blynyddoedd cynnar. Yn 1933, hwyliodd aelodau’r Urdd o Gymru i ogledd Ewrop, ac yn 1948 cynhaliwyd gwersyll rhyngwladol cyntaf yr Urdd yn Aberystwyth.

Roedd yr Urdd hefyd ymhlith y sefydliadau cyntaf i groesawu pobl ifanc o’r Almaen ar ôl yr Ail Ryfel Byd. Heddiw, mae’r un ysbryd o gyfeillgarwch a chyfnewid diwylliannol yn parhau drwy brosiectau ledled y byd.